Профессионал боксдаги фаолиятини ишончли ғалаба билан бошлаган ҳамюртимиз Фазлиддин Ғойибназаровнинг навбатдаги жанги қачон ва қаерда ўтказилиши маълум бўлди.
Унга кўра, Рио Олимпиадаси чемпиони 20 май куни профессионал боксдаги иккинчи жангини ўтказади. Фазлиддин шу куни АҚШнинг Нью-Йорк шаҳридаги дунёга машҳур “Мэдисон Сквер Гарден” аренасида рингга кўтарилади.
Ҳозирча Ғоибназаровнинг рақиби айнан ким бўлиши маълум эмас. Фазлиддиннинг мураббийи Аброр Турсунпўлатовнинг хабар беришича, яқин бир ҳафта ичида рақиб номига ойдинлик киритилади. Машғулотлар эса эртага бошланади.
Маълумот учун, Нью-Йоркдаги бокс оқшомининг марказий жанги америкалик икки йўналиш чемпиони Теренс Кроуфорд иштирокида бўлиб ўтади.
Эслатиб ўтамиз, Фазлиддин Ғойибназаров АҚШнинг Калифорния штати Карсон шаҳрида бўлиб ўтган илк жангида америкалик Виктор Васкесни иккинчи раунддаёқ техник нокаутга учратган эди.
