"Atletiko" ustozi Diyego Simeone Yevropa Chempionlar ligasi yarimfinalidan o‘rin olgan "Real Madrid"ga qarshi bahsdan avval o‘z fikrlari bilan o‘rtoqlashdi.
"Men doimo o‘yinlardan oldin hayajonlanaman. Hamma narsani unutaman, lekin bu tabiiy holat, axir hammamiz ham bosim ostidamiz. Men jamoa oldida kuchli mas’uliyat sezayapman va u tobora oshib bormoqda. Bunday qo‘rquv menda qanday raqib va turnir bo‘lishidan qat’iy nazar har doim uchragan.
"Real" o‘z maydonida to‘p suradi va albatta dastlabki daqiqalardanoq hujumga zo‘r beradi. Ular turli sxemada Isko bilan Xames yoki Asensio bilan o‘ynashlari mumkin.
"Real" tezkor gol urishga intilishi aniq. Biz esa sovuqqonlikni saqlab, o‘z o‘yinimizga sodiq qolishimiz kerak. Bahs murosasiz o‘tishi aniq. Men umid qilamanki, biz o‘zimiz uchun yaratgan vaziyatlardan foydalana olamiz", - dedi Diyego Simeone.
