Boks bo‘yicha O‘zbekiston terma jamoasi a’zosi Hasanboy Do‘smatov (-49 kg) Toshkentda bo‘lib o‘tayotgan Osiyo chempionatini shri-lankalik Palleha Sivankaga qarshi g‘alaba bilan boshladi.
O‘z jangini g‘alaba bilan yakunlagan Olimpiya chempioni, chorak finalda unga raqiblik qilishi kutilgan qozog‘istonlik Jomard Yerjanning nimchorakdagi jangini kuzatib bordi. Qozog‘iston vakili bahsni g‘alaba bilan yakunlagach hamyurtimiz oldindagi jang haqida o‘z fikrlarini bildirib o‘tdi.
- Chorak finaldagi raqib Jomard Yerjan bo‘lishini kutgandim. Uning nimchorakdagi raqibi bo‘lgan Xitoy Taypei vakili o‘rtamiyona bokschi edi. Men jangni murabbiylarim bilan birga kuzatib bordim. Uning xatolarini ko‘rdik. Endi murabbiylar bilan birga taktika ishlab chiqamiz. Maqsadim Osiyo chempionatida g‘alaba qozonib, keyincha Gamburgda o‘tadigan Jahon chempionatida yana bir bor Vatanimiz bayrog‘ini baland ko‘tarish, – dedi Do‘smatov.
