Angliya futbol uyushmasi (FA) quyi ligalarda inqilobiy o‘zgarishlarni sinovdan o‘tkazmoqchi.

BBC xabariga ko‘ra, FA rahbariyati vaqtinchalik chetlatish qoidasini qo‘llab ko‘rishni rejalashtirmoqda.

Unga ko‘ra, futbolchi hakam bilan tortishib, sariq kartochka bilan jazolansa, 10 daqiqa davomida maydonni tark etadi. Bu qoida Angliyaning 7-ligasi va undan ham pastki ligalarda sinovdan o‘tkaziladi.

FA barcha klublarga bu haqda xat jo‘natib, tajribada ishtirok etishni taklif qilgan. Hozirgi kunda Angliyaning havaskorlar ligasida olingan har bir sariq kartochka uchun klublar 10 funt jarima to‘laydi. Tajribada ishtirok etishga rozi bo‘lgan klublar bu jarimadan ozod qilinadi.