Oliy liga 9-turidan o‘rin olgan “Navbahor” - “Lokomotiv” (2:2) o‘yinidan so‘ng mehmonlar ustozi Andrey Miklyayev o‘z fikrlarini aytdi.

«Bugun jangovor va qiziqarli o‘yin bo‘ldi. 90 daqiqa davomida maydonda murosasiz kurash kechganligi muxlislarga yoqdi deb o‘ylayman. Maydondagi kurashlar soni ancha ko‘p bo‘ldi. O‘ylashimcha uchrashuvda ikki ochko yo‘qotdik. Negaki, hisobda oldinda borayotib ikkinchi bo‘lim boshida xatoga yo‘l qo‘yib darvozamizdan to‘p olib chiqdik. Tanaffusdan keyin to‘pni nazorat qilish borasida ustunlikka ega bo‘la turib, gol urishni uddasidan chiqa olmadik. Yigitlarimiz iroda ko‘rsatib, yaxshi o‘yin ko‘rsatishdi va oxirigacha kurashishdi deb hisoblayman. Namanganda muxlislar bilan to‘la o‘yingohda o‘ynash har qanday jamoa uchun oson bo‘lmaydi. Uch ochkoni qo‘lga kirita olmaganimizdan biroz afsuslandik. Lekin, asosiysi oldinga intilishda davom etmoqdamiz. Yaxshi o‘yin uchun futbolchilarimizga rahmat aytaman. Bu yilgi chempionatimiz ancha qiziqarli tarzda kechmoqda. O‘yinlarni qanday o‘tishini oldindan aytish ancha mushkul bo‘lmoqda. Bizga qarshi uchrashuvlar aynan shunday jangovor tarzda kechmoqda. Negaki, barcha jamoalar peshqadamga qarshi bahsga jiddiy tarzda tayyorgarlik ko‘rishmoqda. Muxlislar “Lokomotiv” ishtirokidagi uchrashuvlarni tomosha qilish uchun o‘yingohlarga kelishmoqda. Shu sababli jamoamizga safar o‘yinlarida og‘ir bo‘lmoqda. Biz bu holatga ko‘nikib bormoqdamiz va yigitlarda doim shunday bo‘lishini uqtirmoqdamiz. Bir so‘z bilan aytganda chempionatimiz saviyasi o‘smoqda. Shu o‘rinda “Navbahor” futbol klubi rahbariyatidan o‘yingoh maydonini yaxshilashga e’tibor qaratishlarini so‘rardim. Saviya va o‘yin sifatini oshirish uchun maydon holati ham shunga mos bo‘lmog‘i lozim. Shu paytga qadar ko‘rgan maydonlarimiz orasida eng yomoni aynan Namanganda ekanligini aytishim mumkin. Maydon sifatini yanada yaxshi bo‘lishini istardim. Bu orqali “Navbahor” jamoasi va Namanganda mehmon bo‘ladigan jamoaning o‘yin sifati va saviya yanada ortadi deb o‘ylayman» - dedi Miklyayev.