Oliy liganing 9-turidan o‘rin olgan "Navbahor" - "Lokomotiv" (2:2) o‘yinidan so‘ng Azizbek Turg‘unboyev o‘z fikrlarini bildirdi.
Futbolchi mezbonlarni mag‘lubiyatdan qutqarib qolgan golga mualliflik qilgan edi.
"O‘yin ajoyib ruhda o‘tdi. "Lokomotiv"ga qarshi qiyin uchrashuv o‘tkazdik. Qolaversa ushbu raqib bilan musobaqa jadvalida qimmatli ochkolar uchun kurash olib bormoqdamiz. Xudoga shukur, "Navbahor"dagi birinchi golimni ham urishga muvaffaq bo‘ldim. Dilimdan o‘tkazgan xissiyotlarimni ta’riflashga til ojiz! Xudo xohlasa, keyingi uchrashuvlarda ham gol urib, jamoamga foyda keltirishga harakat qilaman. Barcha jamoadoshlarimning maqsadi - "Navbahor"ni yuqori o‘rinlarga olib chiqishdir! Fursatdan foydalanib, bizni 90 daqiqa davomida qo‘llab-quvvatlab kelgan jonkuyar ishqibozlarimizga ham katta raxmat aytmoqchiman" - dedi Turg‘unboyev.
