Osiyo chempionlar ligasining guruh bosqichidagi so‘nggi tur bahsi "Bunyodkor" uchun ham, "Al-Ayn" uchun ham shunchaki rasmiyatchilikka aylanib qolgandi. Boisi, Amirlik klubi muddatidan avval pley-off yo‘llanmasini hal qilib bo‘lgan bo‘lsa, "qaldirg‘ochlar" guruhdagi eng so‘nggi pog‘onanini "zabt" etib bo‘lgandi. Faqat "Al-Ayn" guruh g‘olibligini qo‘lga kiritish, "Bunyodkor" esa OFK reyting jadvalida O‘zbekiston uchun ochko keltirishga harakat qilib ko‘rishi mumkin edi. Bu borada mezbonlar omadliroq chiqishdi.

Sergey Lushchansiz qolgan toshkentliklarning "Al-Ayn"ga kuchi yetmadi. Buni tan olish kerak. Jamoamiz darvoza daxlsizligini yarim soat davomida saqlab turishdi. Ammo 34-daqiqada jamoamiz maydon markazida to‘pni yo‘qotdi. Shamroniy esa bir himoyachi va darvozabonimizni muammosiz dog‘da qoldirib ketdi.

Al-Aynliklar hisobni ochib olishganidan keyin kuchni tejagan holda o‘yinni olib borishdi. Natijada "Bunyodkor" futbolchilari oldinga o‘ta boshlashdi. Ikkinchi bo‘lim o‘rtalarida Alisher Sanoyev juda qulay vaziyatdan darvozaga aniq zarba bera olmadi.

Uchrashuvning 77-daqiqasida biz yaxshi bilgan Umar Abdulrahmon jarimadan ajoyib to‘p kiritib, bunyodkorchilarning gol urishga bo‘lgan shashtini sindirib qo‘ygandek bo‘ldi. O‘yinning so‘nggi daqiqasida esa Umarning uzatmasidan keyin Diakiy bosh bilan hisobni yirik ko‘rinishga keltirib qo‘ydi.

"Bunyodkor" yirik hisobdagi mag‘lubiyatdan qutulib qolishi mumkin edi. Ammo To‘xtasinov 10 metrlardan aniq zarba bera olmadi.

Parallel kechgan o‘yinda Saudiyaning "Al-Ahli" klubi o‘z uyida Eronning "Zob-Ohan" jamoasini mag‘lub etdi (2:0). Natijada "S" guruhidan "Al-Ayn" va "Al-Ahli" klublari nimchorak finalga yo‘l olishdi.

OCHL-2017, «S» guruhi
«Al-Ayn» (BAA) - «Bunyodkor» (O‘zbekiston) 3:0
8 may, Al-Ayn, soat 20:40. «Hazza bin Zayd» stadioni
Gollar: Nosir ash-SHamroniy (34), Umar Abdulrahmon (77), Ibrohim Diakiy (90+1)
Al-Ayn: Xolid Iso, Kayo, Umar Abduraxmon, Xolid Abduraxmon, Muhnad Salim, Nosir Shamroniy, Li Myung-Ju, Muhammad Xalfan, Salim Juma, Said Juma, Danilo Asprilya
Bunyodkor: Murod Zuxurov, Rustam Ashurmatov, Akram Komilov, Javlon Mirabdullayev, Eldor Shomurodov, Vadim Chemirtan, Donston Hamdamov, Nurillo To‘xtasinov, Davron Umirov, Otabek Shukurov, Mirjamol Qosimov