Madrid sudi «Real» klubining Ispaniya kubogi borasidagi shikoyatini qondirmadi.

Eslatib o‘tamiz, madridliklar Ispaniya kubogining 2015/16 mavsumida diskvalifikasiyaga ega Denis Cherishevni maydonga tushirgani uchun musobaqadan chetlashtirilgandi. Avvalgi mavsumda «Vilyarreal» safida o‘ynab, sariq kartochkalari soni ko‘payib ketgan rossiyalik futbolchi «Kadis»ga qarshi uchrashuvda maydonga tushgandi. O‘yinda «Real» 3:1 hisobida g‘alaba qozongan bo‘lishiga qaramay, musobaqadan chiqarib yuborilgandi.

Shundan so‘ng, madridliklar Qirollik futbol federasiyasining bu qaroridan norozi bo‘lib, uni sudga berishgandi. «Real» Cherishevning diskvalifikasiyasi bo‘yicha yozma ogohlantirish olmagani uchun federasiyadan kompensasiya puli talab qilib, apellyasiya bergandi, biroq bu shikoyat qondirilmadi. Madrid Markaziy sport ma’muriy sudi esa Qirollik federasiyasining qarorini o‘z kuchida qoldirdi.

Sud Cherishevni federasiya tomonidan ogohlantirilishi kerak ekanini tan oldi. Ammo «Real»ning futbolchining diskvalifikasiyasi haqida bilmay qolganini «tasavvur qilib bo‘lmaydigan» holat deb topdi.