Мадрид суди «Реал» клубининг "Черишев иши" юзасидан берган шикоятини қондирмади.
Эслатиб ўтамиз, мадридликлар Испания кубогининг 2015/16 мавсумида дисквалификацияга эга Денис Черишевни майдонга туширгани учун мусобақадан четлаштирилганди. Аввалги мавсумда «Вильярреал» сафида ўйнаб, сариқ карточкалари сони кўпайиб кетган россиялик футболчи «Кадис»га қарши учрашувда майдонга тушганди. Ўйинда «Реал» 3:1 ҳисобида ғалаба қозонган бўлишига қарамай, мусобақадан чиқариб юборилганди.
Шундан сўнг, мадридликлар Қироллик футбол федерациясининг бу қароридан норози бўлиб, уни судга беришганди. «Реал» Черишевнинг дисквалификацияси бўйича ёзма огоҳлантириш олмагани учун федерациядан компенсация пули талаб қилиб, апелляция берганди, бироқ бу шикоят қондирилмади. Мадрид Марказий спорт маъмурий суди эса Қироллик федерациясининг қарорини ўз кучида қолдирди.
Суд Черишевни федерация томонидан огоҳлантирилиши керак эканини тан олди. Аммо «Реал»нинг футболчининг дисквалификацияси ҳақида билмай қолганини «тасаввур қилиб бўлмайдиган» ҳолат деб топди.
