Мадриднинг «Реал» клуби ярим ҳимоячи ва жамоа сардори Федерико Вальвердени сотишга интилмаяпти, чунки у «қаймоқранглилар» таркибидаги энг обрўли ва таъсир доирасига эга футболчилардан бири ҳисобланади. Бу ҳақда El Nacional нашри хабар бермоқда.

Манбанинг маълумотларига кўра, «Қироллик клуби» Вальвердени сотиш вариантини фақатгина унга қизиқиш билдираётган жамоа 100 миллион евродан сезиларли даражада юқори бўлган сумма таклиф қилсагина кўриб чиқади. Бундан ташқари, «Реал» мураббийлар штаби унинг ўрнига муносиб номзод топа олишига кўзи етиши керак.

Вальверденинг обрўси баланд бўлишига қарамай, ярим ҳимоячи Орельен Тчуамени билан содир бўлган муштлашувдан сўнг, у клубда «дахлсиз футболчи» мақомини йўқотгани алоҳида таъкидланган.

Якунланган мавсумда уругвайлик футболчи барча турнирларда 49 та учрашувда майдонга тушиб, ўз ҳисобига тўққизта гол ва 13 та голли узатмани ёздириб қўйди. Ўйинчининг клуб билан амалдаги меҳнат шартномаси 2029 йилнинг ёзига қадар мўлжалланган. Transfermarkt порталида берилган маълумотларга кўра, футболчининг бозор қиймати 90 миллион еврони ташкил этади.