Italiya chempionatida Milan shahrining ikki klubi qiziq holatga tushib qolgan.

Ayni paytda «Milan» va «Inter» mos ravishda 6 va 7-o‘rinni egallab turibdi va go‘yo Yevropa ligasi yo‘llanmasi uchun kurash olib borayotgandek tuyulmoqda.

Aslida har ikkala klub nufuzi jihatidan Chempionlar ligasidan past hisoblanadigan turnir yo‘llanmasini qo‘lga kiritishdan iloji boricha o‘zini olib qochmoqda. So‘nggi o‘yinlardagi qoniqarsiz natijalar buni yaqqol isbotlamoqda.

Gap shundaki, Yevropa ligasining saralash o‘yinlari juda erta – 27 iyul kuni start oladi. Bu esa klublarning yozgi ta’tildagi rejalariga keskin o‘zgarish kiritadi. Xususan, Osiyo bo‘ylab tashkil qilinayotgan mavsumoldi o‘yinlarini bekor qilinishiga olib keladi. Masalan, 24 iyul kuni Xitoyning Nankin shahrida «Milan derbisi» o‘tkazilishi lozim. Har ikkala klubning xo‘jayinlari xitoyliklar ekanini inobatga oladigan bo‘lsak, bu o‘yinning bekor qilinishi ularni qoniqtirmasa kerak.

«Calcio e Finanza» nashrining hisob-kitobiga ko‘ra, Yevropa ligasida muvaffaqiyatli ishtirok etgan klublar jami 14-15 mln yevro daromad olishi mumkin. Osiyo bo‘ylab bir necha haftalik sayohat esa bundan 4-5 mln yevro ko‘proq daromad olish imkoniyatini beradi. Shu tufayli ham «Inter» va «Milan» ikki o‘t orasida qolgan...