«Yuventus» Yevropaning grand klublaridan biri hisoblanadi.

A Seriyada yoki Italiya Kubogi doirasida birorta jamoa “keksa sinyora”ga teng kela olmaydi. Bu mavsumda esa turinliklar Skudettoni ketma-ket 6 marta yutgan jamoaga aylanishi tobora oydinlashib bormoqda.

“Byankoneri”lar milliy birinchilikda butunlay daxlsiz bo‘lib kelishmoqda. A Seriyani qozonish bu jamoa uchun odatiy holga aylanib bo‘ldi. O‘z hukmronligini davomiyligini saqlashda esa klub rahbariyatining ajoyib transferlari ham sabab bo‘lmoqda. Ushbu mavsum boshida Miralim Pyanich (“Roma”) va Gonsalo Iguain (“Napoli”)larning transferi buning yaqqol isbotidir. Yangi qo‘shilgan futbolchilar jamoaning o‘yinini sezilarli tarzda kuchaytirishdi.

“Yuventus” nafaqat “iste’molchi” vazifasida faol, balki yulduzlarni yetishtirishda ham yaxshi namuna bo‘la oladi. So‘nggi olti mavsumda Pol Pogba, Arturo Vidal, Alvaro Moratalar o‘rtacha saviyada qo‘shilib, jamoa safini yulduz maqomida tark etishdi. Yangi yulduz Paulo Dibala esa bir qancha grand jamoalarning diqqat markazida turibdi.

Jamoa tarkibini Pogba va Vidal singari bir qancha yetakchi a’zolari tark etganiga qaramay, jamoa o‘z oldiga yuqori marralarni qo‘ygan. Biroq, Leonardo Bonuchchi saqlab qolindi. Paulo Dibala ham yaqindagina yangi shartnoma imzoladi. Bonuchchining klubda saqlab qolinishi eng muhimi bo‘ldi. Aynan u turinliklar himoya chizig‘ining muhim bo‘lagi hisoblanadi.

Yevropaning juda oz jamoalarida 30 yoshdan oshgan futbolchilar faoliyat suradi. “Yuventus”da esa Lilian Tyuramdan Pirlogacha, Evradan tortib Alveshgacha bo‘lgan bir qancha futbolchilarni sanay olamiz. Bonuchchining sheriklari Kellini va Barzalyilar ham 30 yoshdan oshgan. Deyarli 40 yoshli darvozabon Buffon esa tirik afsonaga aylanib ulgurdi.

«Yuventus» himoyasi Chempionlar Ligasida 2 gol o‘tkazgan holda butun davrlarning eng mustahkam himoyasiga aylangan. Himoya chizig‘i bilan birgalikda jamoa hujumni ham kuchaytirishdi. Iguaining 90 million yevroga olib kelinishi klubning maqsadlaridan darak beradi.

O‘tgan haftada «Monako» darvozasiga aynan uning kiritgan dubli jamoasining finalga chiqishi uchun ajoyib imkoniyat yaratib berdi. Argentinalik futbolchi 10 uchrashuvda 5 gol kiritib Chempionlar Ligasidagi statistikasini yaxshilab oldi. Bugun esa Iguain ushbu ko‘rsatkichini yanada yaxshilab olishi mumkin. Turinliklar 21 yildan beri yuta olmay kelayotgan sovrin uchun muhim qadamni tashladi.