Buxoro shahrida 1979 yili “Paxtakor” jamoasi safida aviahalokatga uchragan Ravil Agishev va Vladimir Sobirovning xotirasiga bag‘ishlab respublika turniri o‘tkazildi.
9 may Xotira va Qadrlash kuni arafasida ko‘hna shaharda tashkil etilgan musobaqa yakuniga yetdi. Ikki yosh toifasida o‘tkazilgan turnirda ikkita jamoa bilan ishtirok etgan «Navbahor» tarbiyalanuvchilari Namanganga g‘olib va sovrindor sifatida qaytishdi.
2001 yilda tug‘ilgan o‘smirlar finalda Buxoro terma jamoasi vakillarini 2:0 hisobida mag‘lubiyatga uchratib, turnir g‘olibligini qo‘lga kiritishdi. Ushbu yosh toifasidagi futbolchilarimiz guruh bosqida peshqadam bo‘lgach, yarimfinalda samarqandlik tengqurlaridan ustun kelgandi - 2:0. Musobaqa yakuniga ko‘ra to‘purarlik mahoratini namoyish etgan Boburshoh Sobirov eng yaxshi hujumchi nominasiyasi g‘olibi sifatida e’tirof etildi.
2004 yilda tug‘ilgan futbolchilar uchinchi o‘rin bilan cheklanishdi. Bu yosh toifasidagi tarbiyalanuvchilar ham guruh bosqichini ikkita g‘alaba bilan yakunladi. Yarimfinalda o‘smirlar buxoroliklar bilan bahs olib bordi. Mezbon jamoa bilan o‘tgan uchrashuvda namanganliklar 1:2 hisobida imkoniyatni boy berishdi. Turnir nizomiga ko‘ra yarimfinalda mag‘lub bo‘lgan jamoalar ham sovrindor sifatida e’tirof etildi.
