Fransiya terma jamoasining sobiq hujumchisi David Trezege faoliyatini deyarli ikkita klubda o‘tkazgan. Dastlab besh mavsum «Monako»da to‘p surdi. Bu davr oralig‘ida u taniqli futbolchilardan biriga aylandi. Keyinchalik o‘n yil «Yuventus»da o‘ynadi. Buni qarangki, YECHL-2016 |2017 yarim finalida uning sobiq jamoalari to‘qnashadigan bo‘ldi. Mazkur uchrashuvdan oldin FIFA rasmiy sayti Trezege bilan suhbat uyushtirdi.
- «Monako» va «Yuventus» bahsi siz uchun alohida ahamiyat kasb etadi. Bu ikki jamoaning o‘zaro to‘qnashishini bilganingizda xayolingizga nima keldi?
- To‘g‘risini aytsam, «Monako»-«Yuventus» finalini ko‘rishni istagandim, lekin ular oldinroq to‘qnashadigan bo‘lishdi. Nima bo‘lgan taqdirda ham, bu men uchun o‘ziga xos o‘yin. Chunki ushbu ikki klub hayotimning muhim bo‘lagiga aylanib ulgurgan. Albatta, bo‘lajak o‘yinda «Yuventus» favorit hisoblanadi. Biroq «Monako»ning oldingi uchrashuvlardagi ishtirokini ko‘rib, bemalol raqobatlasha oladi, degan fikrga keldim.
- «Real» va «Atletiko»? Qaysi klubga muxlislik qilasiz? Hamyurtingiz Antuan Grizmann bo‘lajak uchrashuvda o‘zini ko‘rsata olarmikan?
- «Real» bunday o‘yinlarda juda kuchli o‘ynaydi. Qolaversa, jamoaning tarkibi ham yulduzli. Ularning YECHL bosh sovrini uchun asosiy da’vogar sanalishlari bejiz emas. Boshqa tarafdan, Antuan mazkur bahsda muhim rol o‘ynaydi, deb hisoblayman. Birinchidan, u «Atletiko» yetakchisi. Ikkinchidan, u Milanda bo‘lib o‘tgan finaldagi mag‘lubiyat uchun revansh olishga urinadi. O‘shanda Grizmann penaltini aniq amalga oshira olmagandi. Joriy mavsumda u yanada kuchaydi. Antuan va uning jamoasi uchun bo‘lajak o‘yindagi g‘alabaning ahamiyati juda yuqori.
- Grizmann «Oltin to‘p-2016»ni topshirish marosimida Krishtianu Ronaldu va Lionel Messi bilan kuchli uchlikdan joy oldi. Nima deb o‘ylaysiz, u shunday sharafga haqli ravishda erishdimi?
