“Shumbola” filmidagi Qoravoy roli bilan elga tanilgan Abduraim Abduvahobov O‘zbekiston terma jamoasiga jahon chempionatiga chiqish uchun nima yetishmayotganini aytdi.

«Suyunchi» badiiy filmidagi Shermat akaning oilasi hammaning yodida. Ularning oilaviy futbol jamoasi g‘alaba qozonishi uchun bir futbolchi kamlik qiladi. Hozirgi o‘zbek futbolining jahon chempionatiga azaliy besamar urinishlari, doim muhim o‘yinlardagi mag‘lubiyati haqida o‘ylasak, shu film esga tushadi.

«Suyunchi»da Abdulla rolini ijro etgan aktyor O‘zbekistonda xizmat ko‘rsatgan artist, «Do‘stlik» ordeni sohibi Abduraim Abduvahobov “Oila davrasida” nashri bilan suhbatini ayni shu mavzuda boshladi.

“Bir otaxon bilan gaplashganimda «mana yoshim yetmishga borib qoldi, terma jamoamizning jahon chempionatiga chiqishini hali ham kutyapman», degan edi. Nazarimda, futbolchilarimizga vijdon yetishmayapti. To‘g‘ri, qarashimda ayrim xatoliklar bo‘lishi mumkin, lekin ularning yaratib berilgan shunday sharoitda futbolni qoyillatmaslikka haqqi yo‘q. Maydonga tushganda o‘yinchi o‘zidan kechib, hamma narsani unutib, faqat futbolning ichida yashashi kerak. Bizning o‘yinchilar futbolni emas, o‘zini ko‘proq yaxshi ko‘radi”, – deydi san’atkor.