Oliy liga 11-turidan o‘rin olgan "Bunyodkor” – “Paxtakor” (1:1) uchrashuvidan keyingi matbuot anjumanida “qaldirg‘ochlar” ustozi Mirjalol Qosimov o‘z fikrlarini aytdi.
"Uchrashuvni juda faol boshladik va shunday davom ettirdik. Natijada gol urib, oldinga chiqib oldik. Afsuski, tanaffusdan keyin yigitlar hisobni ushlab qolishga intilishdi. Kiyim almashtirish xonasida ko‘p gapirdik, tushuntirdik. Biroq maydonga chiqqanidan keyin ularning ruhiyati hisobga qarab qoldi. Bu borada ishlaymiz, vaziyatni o‘nglashga harakat qilamiz. G‘alabani durangga almashganimiz yaxshi bo‘lmadi. Tarkibda raqobat yo‘q. Agar raqobat qilsak bu jamoaning ham, futbolchilarning ham o‘sishiga sabab bo‘lardi", - dedi Mirjalol Qosimov.
