O‘zbekiston kubogi 1/8 finalidan o‘rin olgan “Lokomotiv” – “Qizilqum” (5:0) o‘yinidan keyin “temiryo‘lchilar” ustozi Andrey Miklyayev o‘z fikrini aytdi.
"Yakunda qayd etilgan hisob o‘yinga mos bo‘ldi, deya olaman. Zero bugun biz raqibdan ustunlik qila oldik. Maydonga tushib g‘alabaga xissa qo‘shgan barcha yigitlarga minnatdorchilik bildiraman.
Bugun jarohat tufayli bir necha nafar futbolchi uchrashuvda ishtirok eta olmadi. Masalan, Ikrom Aliboyevda jarohat bor. Yaqinda Islom To‘xtaxo‘jayev ham jarohat orttirib oldi. Islom yaqin 2-3 hafta maydonga tusha olmaydi. Keyingi o‘yinlarni tarkibda bor futbolchilar bilan o‘tkazishga majburmiz.
Yozda tarkibda o‘zgarishlar bo‘ladimi, yo‘qmi – bunisini ko‘ramiz. Ayni paytda tig‘iz taqvim asosida o‘ynayotganimiz bois yangi o‘yinchilar harakatini kuzata olmayapman" - dedi tajribali mutaxassis.
