Bugun O‘zbekiston Professional futbol ligasining navbatdagi tartib-intizom qo‘mitasining yig‘ilishi bo‘lib o‘tdi.
Mazkur yig‘ilishda mamlakat chempionati va kubogi, yoshlar birinchiligidan o‘rin olgan uchrashuvlarda qizil kartochka olgan futbolchi va murabbiylar masalasi ko‘rib chiqildi.
Bu TIQ qarori "Navbahor" uchun ahamiyatga ega edi. Buxoroda o‘tgan uchrashuvda jamoa bosh murabbiyi Ilhom Mo‘minjonov zaxira o‘rindig‘idan chetlatilgan bo‘lsa Oybek Qilichev qizil kartochka olgandi. Qolaversa, kecha Farg‘onada o‘tkazilgan kubok bahsida Alisher Samatov ham qizil kartochkaga loyiq topilgandi.
Bundan biroz vaqt oldin yakunlangan tartib-intizom qo‘mitasining yig‘ilishida jamoa a’zolarini qancha o‘yinga diskvalifikasiya qilinganliklari ma’lum bo‘ldi.
Oliy liga
11-turdan o‘rin olgan “Buxoro” – “Navbahor” uchrashuvi tanaffus paytida tajovuzkor xatti-harakati uchun zaxira o‘rindig‘idan chetlatilgan “Navbahor” jamoasi bosh murabbiyi Ilhom Mo‘minjonov bitta o‘yinga diskvalifikasiya qilindi va jarimaga tortildi. Bundan tashqari “Buxoro” ustozi Ulug‘bek Baqoyev ham bitta o‘yinga diskvalifikasiya qilinib, jarimaga tortilgan.
“Buxoro” – “Navbahor” jamoalari o‘rtasidagi uchrashuvda raqibini yuziga urganligi uchun maydondan chetlatilgan “Navbahor” yarim himoyachisi Oybek Qilichev ikkita o‘yinga diskvalifikasiya qilinib, jarimaga tortildi.
O‘zbekiston kubogi
Mamlakat kubogining 1/8 finalidan o‘rin olgan “Neftchi” – “Navbahor” jamoalari o‘rtasidagi dastlabki uchrashuvda tajovuzkor harakati uchun maydondan chetlatilgan “Navbahor” yarim himoyachisi Alisher Samatov ikkita o‘yinga diskvalifikasiya qilindi.
