Oliy Liganing 12-turidan o‘rin olgan e’tiborli uchrashuvlardan biri Samarqandda o‘tadi. Shu kuni «Dinamo» jamoasi qo‘shni Navoiy viloyatining bosh jamoasi «Qizilqum»ni qabul qiladi.
JORIY MAVSUMDA KIMDA QANDAY NATIJA?
Ushbu mavsumni har ikki jamoa ham kutilmaganda ikki xil boshladi. Yilni omadli boshlagan «Dinamo» 11-turdan keyin 4 g‘alaba, 3 durang, 4 mag‘lubiyat bilan 15 ochko jamg‘arib, 7-pog‘onadan o‘rin olgan bo‘lsa, «Qizilqum» nisbatan nomdor tarkibga ega bo‘lsada, 2 g‘alaba, 5 durang, 4 mag‘lubiyat bilan 13-o‘rinni band etib turibdi.
«Dinamo»ning Oliy Ligadagi so‘nggi besh turdagi natijasi:
Bunyodkor – Dinamo – 1:1
Dinamo – So‘g‘diyona – 2:2
Olmaliq – Dinamo - 2:0
Dinamo - Nasaf - 1:1
Obod - Dinamo - 3:1.
«Qizilqum»ning Oliy Ligadagi so‘nggi besh turdagi natijasi:
Olmaliq – Qizilqum – 0:0
Qizilqum – Nasaf - 1:1
Obod – Qizilqum – 1:1
Lokomotiv – Qizilqum – 2:0
Qizilqum – Neftchi - 2:2
BUGUN KIMLAR O‘YNAY OLISHMAYDI?
«Dinamo» jamoasi himoyachisi Jasur Azimov ushbu turdagi «Qizilqum»ga qarshi o‘yinda «Dinamo»ga yordam bera olmaydi.
Gap shundaki, Jasur Azimov so‘nggi ikki turda «Nasaf» va «Obod» bilan o‘tgan 10 va 11-turlarda bosh hakam tomonidan ogohlantirishlar olgan edi. Bu uning joriy yilgi chempionatdagi 4-sariq kartochkasi bo‘ldi. Shu bois, 12-turda Jasur Azimov diskvalifikasiya tufayli maydonga tusha olmaydi.
Bunday futbolchi navoiyliklar safida ham bor. Jamoa yarimhimoyachisiFayzulla Qambarov ham «Neftchi»ga qarshi bahsda mavsumdagi 4-sariq kartochkasini olib, bugungi bahsni o‘tkazib yuborishga majbur.
O‘ZARO O‘YINLAR: 32-TO‘QNASHUV
Bu ikki klub Oliy ligada 31 bora to‘qnash kelgan. Ushbu o‘yinlardan 13 tasida navoiyliklar g‘olib bo‘lishgan. 8 o‘yin durang hisobida yakunlangan. “Dinamo” shu kunga qadar Oliy Ligada “Qizilqum”ni 10 marta mag‘lubiyatga uchrata olgan.
“Dinamo” o‘yinlarda 43 ta gol urgan va 42 ta o‘tkazib yuborgan. Ochko ishlash borasida “Qizilqum” o‘zaro o‘yinlarda 48 ochko olgan, «Dinamo» esa 39 ochko. “Qizilqum”ning Oliy ligada “Dinamo” ustidan erishgan eng yirik g‘alabasi 3:1 ni tashkil qiladi. “Dinamo”ning esa navoiyliklar ustidan qozongan eng yirik g‘alabasi – 6:1 ga teng.
“Dinamo” Samarqandda bu raqibni 9 marta taslim qilgan. Faqat 5 ta bahsda durang qayd etilgan. “Qizilqum” safardan 2 marta g‘alaba bilan qaytgan.
Samarqandda o‘tgan so‘nggi 7 uchrashuv:
17.05.2015 «Dinamo» - «Qizilqum» 2:2
12.09.2014 «Dinamo» - «Qizilqum» 2:1
04.08.2013 «Dinamo» - «Qizilqum» 1:0
27.09.2012 «Dinamo» - «Qizilqum» 3:0
21.08.2011 «Dinamo» - «Qizilqum» 1:1
01.05.2010 «Dinamo» - «Qizilqum» 0:0
25.06.2009 «Dinamo» - «Qizilqum» 3:0
ESKI TANISHLAR…
«Dinamo» - «Qizilqum» uchrashuvi oldidan tarkibga nazar tashlarkanmiz, bir qator eski tanishlarni ko‘rishimiz mumkin. Jumladan, bugungi kunda Ilhom Yunusov, Erkin Boydullayev singari samarqandlik futbolchilar «Qizilqum» yetakchilari sifatida to‘p surishayotgan bo‘lsa, Navoiy jamoasi yarimhimoyachi Otabek Zokirov ham 2015 yilgi mavsumni «Dinamo» safida o‘tkazgan edi.
«Dinamo» himoyachisi Aleksey Nikolayev esa faoliyatini aynan «Qizilqum»da boshlagan. O‘shanda Zarafshon shahri sharafini himoya qilgan klub bugungi kunda o‘z o‘yinlarini Navoiy shahrida o‘tkazmoqda.
O‘YINNI KIM BOSHQARADI?
Uchrashuvni boshqarib borish Viktor Serazetdinov boshchiligidagi toshkentlik hakamlar brigadasiga topshirilgan.
Oliy Liga. 12-tur. 26 may (juma)
«Dinamo» (Samarqand) – «Qizilqum» (Navoiy)
Hakamlar: V. Serazetdinov (Toshkent), M. Saidqosimov (Toshkent), A. Sapenko (Toshkent vil.), N. Qosimov (Qarshi)
Nazoratchi: A. Klepikov (Toshkent).
O‘zPFL vakili: A. Inoyatov.
Uchrashuv boshlanish vaqti: 18:00.
