“Lokomotiv” bugun Oliy Liga 12-tur uchrashuvlari doirasida Farg‘onaning “Neftchi” jamoasiga qarshi bahs olib boradi.

FAKT: “Lokomotiv” ayni damda 10 ta o‘yindan so‘ng 23 ochko jamg‘argancha, Oliy Liga musobaqa jadvalida karvonboshilik qilmoqda. “Neftchi” hisobida esa 11 ta uchrashuvdan so‘ng 10 ochko mavjud va farg‘onaliklar musobaqa jadvalining 15-pog‘onasidan joy olishgan.

O‘zbekistonda o‘ziga yarasha nom qozongan ushbu ikki klub shu paytga qadar milliy chempionatimiz doirasida 24 bor o‘zaro to‘qnash kelishgan. Mazkur qarama-qarshilikda “temiryo‘lchilar” jamoasi ustunlikka ega.

“Lokomotiv” o‘tkazilgan 13 ta bellashuvni o‘z foydasiga hal etgan. 7 ta o‘yin esa “Neftchi”ning g‘alabasi bilan tugagan. Yana 4 ta bahs durang bilan o‘z nihoyasiga yetgan. Qayd etish joizki, duranglarning barchasi 1:1 hisobida yakunlangan. O‘zaro uchrashuvlardagi to‘plar nisbati ham jamoamiz tomonida – 40-32.

“Lokomotiv” “Neftchi” ustidan o‘tgan yili 4:0 hisobida g‘alaba qozongandi. O‘sha o‘yin “Lokomotiv”ning Farg‘ona jamoasi ustidan erishgan eng yirik g‘alabasi bo‘lib turibdi.

Yana bir jihatga alohida e’tibor qaratish joiz: So‘nggi bor “Neftchi” “Lokomotiv”ni 2010 yilgi mavsumda o‘z uyida 2:1 hisobida mag‘lubiyatga uchratgandi. Shundan buyon “temiryo‘lchilar” farg‘onaliklarga yutkazmay kelmoqda.