Oliy liga 12-turidan o‘rin olgan «Dinamo» - «Qizilqum» (0:1) uchrashuvidan keyin «Qizilqum» klubi bosh menejeri Hamid Aktamov o‘yin borasidagi fikrlari bilan o‘rtoqlashdi.
- Bugun hujumkor va tomoshabop o‘yin bo‘ldi. Futbolchilarimizga katta rahmat deyman, ular o‘yin oxirigacha kurashishdi. Navoiydan kelgan muxlislarimiz ham bizni qo‘llab-quvvatlashdi, ularga ham rahmat. «Dinamo» jamoasi juda yaxshi shakllangan jamoa ekan, bugun buni amalda ham ko‘rsatishdi. Ularga keyingi o‘yinlarda omad tilayman.
- «Qizilqum» urgan goldagi vaziyat borasida qandaydir fikr bildira olasizmi?
- Jarima to‘pini to‘g‘ri amalga oshirib, to‘pni jarima maydoniga yetkazishdi va mezbonlar futbolchisi o‘z darvozasiga urib qo‘ydi. Fikrimcha, bu yerda «ofsayd» yo‘q, to‘g‘ri gol urilgandi. Buni muhokama qilmayman, nazoratchilarning vazifasi bu.
- «Qizilqum» tarkibi ancha kuchli. Yunusov, Boydullayev, Gevorkyan, Hasanovlar tarkibda bor. Ammo jamoaning pastki o‘rinlarda yurganiga bosh sabab nima?
- Umid qilamanki, jamoaning omadsiz kunlari ortda qoldi. Mana bugundan yana g‘alaba qozonishni boshladik. Jamoada barcha narsa yetarli. O‘ylaymanki, buyog‘iga muxlislarni xursand etishda davom etamiz.
