Олий лига 12-туридан ўрин олган «Динамо» - «Қизилқум» (0:1) учрашувидан кейин «Қизилқум» клуби бош менежери Ҳамид Актамов ўйин борасидаги фикрлари билан ўртоқлашди.
- Бугун ҳужумкор ва томошабоп ўйин бўлди. Футболчиларимизга катта раҳмат дейман, улар ўйин охиригача курашишди. Навоийдан келган мухлисларимиз ҳам бизни қўллаб-қувватлашди, уларга ҳам раҳмат. «Динамо» жамоаси жуда яхши шаклланган жамоа экан, бугун буни амалда ҳам кўрсатишди. Уларга кейинги ўйинларда омад тилайман.
- «Қизилқум» урган голдаги вазият борасида қандайдир фикр билдира оласизми?
- Жарима тўпини тўғри амалга ошириб, тўпни жарима майдонига етказишди ва мезбонлар футболчиси ўз дарвозасига уриб қўйди. Фикримча, бу ерда «офсайд» йўқ, тўғри гол урилганди. Буни муҳокама қилмайман, назоратчиларнинг вазифаси бу.
- «Қизилқум» таркиби анча кучли. Юнусов, Бойдуллаев, Геворкян, Ҳасановлар таркибда бор. Аммо жамоанинг пастки ўринларда юрганига бош сабаб нима?
- Умид қиламанки, жамоанинг омадсиз кунлари ортда қолди. Мана бугундан яна ғалаба қозонишни бошладик. Жамоада барча нарса етарли. Ўйлайманки, буёғига мухлисларни хурсанд этишда давом этамиз.
