Farg‘onaning “Neftchi” jamoasi 2017 yilgi mavsumni ko‘ngildagidek o‘tkaza olmayapti.

Birinchi davra yakunlanishiga oz fursat qolganda jamoa turnir jadvalining quyi pog‘onalarini band etib turibdi.

Oliy liga 12-turidan o‘rin olgan “Lokomotiv” – “Neftchi” bahsidan so‘ng Farg‘ona viloyati hokimi Shuhrat Madaminovich G‘aniyev klub qarorgohida yig‘ilish o‘tkazdi. Yig‘ilishda shu kunga qadar klub raisi sifatida faoliyat olib borgan Rustam Rahmonovich Abdullayev hamda jamoa katta murabbiyi Murod Muzaffarovich Ismoilov o‘z arizasiga ko‘ra iste’foga chiqarildi. Bosh murabbiy Andrey Vitalyevich Fyodorov esa jamoaga yangi bosh murabbiy topilgunga qadar vaqtincha ishlaydi.

Jamoa tarkibida ham katta o‘zgarishlar kuzatiladi. Faqat bu jarayon birinchi davra yakuniga yetkanidan so‘ng amalga oshiriladi. Klub rahbarlari tomonidan jamoa oldida yuqori ko‘rsatkichlarni qayd etish vazifasi qo‘yilmoqda.

Jamoa raisi lavozimiga Farg‘ona futbol federasiyasi vise-prezidenti Tohir Veysalovich Kapadze tayinlandi.