4 iyun kuni Birinchi liga jamoalari 13-tur o‘yinlarini o‘tkazishdi.
«Xorazm» o‘z maydonida «Yangiyer»ni qabul qildi. O‘yin mezbonlar uchun yaxshi boshlandi. 9-daqiqada Timur Bekchanov hisobni ochdi. Shundan so‘ng tashabbus mezbonlar tomonga o‘tdi. Bo‘lim o‘rtasiga kelib, xorazmliklar 2 daqiqa ichida 2ta gol urishga muvaffaq bo‘lishdi. 23-daqiqada Timur Ismoilov burchak zarbasidan oshirilgan to‘pni boshi bilan darvozaga yo‘lladi. Bir daqiqa o‘tgach, Sardor Matmuratov himoyachidan qochib ketgan holda, darvozabon bilan yuzma-yuz chiqib, yaqin masofadan gol urishga muvaffaq bo‘ldi.
Hisobning 3:0 ko‘rinishiga kelishi mezbonlarni xotirjam qildi chog‘i, keyingi daqiqalarda ular o‘yin tizginini qo‘ldan chiqarib yuborishdi. 33-daqiqada Davlatov hisobdagi farqni qisqartirdi. Birinchi bo‘limga qo‘shib berilgan daqiqalarda esa, himoyachilarning ketma-ket qo‘pol xatolari tufayli «Xorazm» o‘z darvozasidan ikkita to‘p olib chiqdi – 3:3.
Ikkinchi bo‘limda mezbonlar bu zarbadan o‘ziga kelolmadi. «Yangiyer» esa bir necha xavfli hujumlarni uyushtirib, g‘alabani qo‘lga kiritishi ham mumkin edi. So‘nggi daqiqalarda Davlatovning zarbasidan so‘ng, to‘p darvoza to‘siniga tegib qaytdi.
Birinchi liga, 13-tur
4 iyun, Urganch. «Olimpiya zaxiralari sport kolleji» stadioni. 735 tomoshabin
«Xorazm» (Urganch) – «Yangiyer» (YAngiyer) – 3:3 (3:3)
Gollar: T. Bekchanov (9), T. Ismoilov (23), S. Matmuratov (24) – N. Davlatov (33). A. Tursunqulov (45+2), U. Bobanazarov (45+3).
Hakamlar: F. Norsafarov (Qarshi) – 8,2, A. Burov (Buxoro) – 8,4, SH. Rahmatov (Buxoro) – 8,2, I. Abdusharipov - 8
Inspektor: I. Sharipov (Buxoro)
Ogohlantirish: A. Hakimov (71, Yangiyer).
