4 июнь куни Биринчи лига жамоалари 13-тур ўйинларини ўтказишди.

«Хоразм» ўз майдонида «Янгиер»ни қабул қилди. Ўйин мезбонлар учун яхши бошланди. 9-дақиқада Тимур Бекчанов ҳисобни очди. Шундан сўнг ташаббус мезбонлар томонга ўтди. Бўлим ўртасига келиб, хоразмликлар 2 дақиқа ичида 2та гол уришга муваффақ бўлишди. 23-дақиқада Тимур Исмоилов бурчак зарбасидан оширилган тўпни боши билан дарвозага йўллади. Бир дақиқа ўтгач, Сардор Матмуратов ҳимоячидан қочиб кетган ҳолда, дарвозабон билан юзма-юз чиқиб, яқин масофадан гол уришга муваффақ бўлди.

Ҳисобнинг 3:0 кўринишига келиши мезбонларни хотиржам қилди чоғи, кейинги дақиқаларда улар ўйин тизгинини қўлдан чиқариб юборишди. 33-дақиқада Давлатов ҳисобдаги фарқни қисқартирди. Биринчи бўлимга қўшиб берилган дақиқаларда эса, ҳимоячиларнинг кетма-кет қўпол хатолари туфайли «Хоразм» ўз дарвозасидан иккита тўп олиб чиқди – 3:3.

Иккинчи бўлимда мезбонлар бу зарбадан ўзига келолмади. «Янгиер» эса бир неча хавфли ҳужумларни уюштириб, ғалабани қўлга киритиши ҳам мумкин эди. Сўнгги дақиқаларда Давлатовнинг зарбасидан сўнг, тўп дарвоза тўсинига тегиб қайтди.

Биринчи лига, 13-тур
4 июнь, Урганч. «Олимпия захиралари спорт коллежи» стадиони. 735 томошабин
«Хоразм» (Урганч) – «Янгиер» (Янгиер) – 3:3 (3:3)
Голлар: Т. Бекчанов (9), Т. Исмоилов (23), С. Матмуратов (24) – Н. Давлатов (33). А. Турсунқулов (45+2), У. Бобаназаров (45+3).
Ҳакамлар: Ф. Норсафаров (Қарши) – 8,2, А. Буров (Бухоро) – 8,4, Ш. Раҳматов (Бухоро) – 8,2, И. Абдушарипов - 8
Инспектор: И. Шарипов (Бухоро)
Огоҳлантириш: А. Ҳакимов (71, Янгиер).