JCH-2018 saralash bosqichining Osiyo mintaqasidan o‘rin olgan Avstraliya va Saudiya Arabistoni terma jamoalari o‘rtasida o‘yin bo‘lib o‘tdi. Qiziqarli kechgan uchrashuvni o‘zbekistonlik hakam Ravshan Ermatov boshqarib bordi.

Tanaffusga qadar Tom Jurich ikki marta "kengurular"ni hisobda oldinga olib chiqqan bo‘lsa, Dovsariy va Sahlaviy muvozanatni tiklashdi. Ikkinchi bo‘lim o‘rtalarida Tom Rogich Avstraliyaga g‘alaba keltiruvchi gol muallifiga aylandi.

Ushbu g‘alabadan keyin Avstraliya o‘z ochkolarini 16taga yetkazib, Saudiyaga yetib oldi. Ulardan bitta kam o‘yin o‘tkazgan Yaponiya hisobida ham shuncha ochko bor. "V" guruhida dastlabki 3ta o‘rin mana shu terma egallashi deyarli aniq bo‘lib ulgurdi. Birinchi va ikkinchi o‘rinni olgan jamoalar to‘g‘ridan-to‘g‘ri Rossiya-2018 yo‘llanmasini yo‘lga kiritsa, 3-pog‘onani band etgan terma jamoa pley-off bosqichlarida ishtirok etadi: dastlab "A" guruhida 3-o‘rinni olgan terma jamoa, bu bosqchidan o‘tsa, keyin KONKAKAF mintaqasining to‘rtinchi termasi bilan.

JCH-2018 saralash. 3-bosqich. "V" guruhi, 8-tur
AVSTRALIYA - SAUDIYA ARABISTONI 3:2 (2:2)
Gollar: Tomi Jurich (7, 36), Tom Rogich (64) — Salim ad-Dovsariy (23), Muhammad as-Sahlaviy (45+2)