2016 yilgi Angliya Premyer Ligasining eng yaxshi o‘yinchisi bo‘lgan Riyoz Mahrez “Lester”dan ketish istagini bildirdi.
France Football nashri futbolchi uchun ideal bo‘lgan jamoalarni tuzib chiqdi. Demak jazoyirlik futbolchi faoliyatini davom ettirishi mumkin bo‘lgan klublar quyidagicha:
«Arsenal»
Angliya Kubogini arang yutib obro‘sini saqlab qolgan Arsen Venger yozgi transfer mavsumida jamoasini kuchaytirishi turgan gap. Mahrez esa londonliklar safiga kelib qo‘shilishi mumkin. Boisi, fransiyalik murabbiy u haqida iliq fikrlarini bildirib o‘tgan : « Men bu futbolchini yoqtiraman. « Lester » chempion bo‘lgan yili u muhim vazifani o‘ynagan edi. Bu mavsum ular uchun qiyin kechdi, biroq bu holat uning qobiliyatiga zarracha ta’sir qilmaydi. » Jazoyirlik futbolchi uchun jamoa rasmiy tarzda chiqqani yo‘q. Ammo o‘ng qanot hujumkor yarim himoyachi « to‘pchilar » uchun juda mos tushadi. Kamiga, Mahrez Angliyada qolishni istashini ham aytib o‘tdi. Faqatgina yagona muammo « Arsenal » keyingi mavsumda Chempionlar Ligasida emas, Yevropa Ligasida ishtirok etadi. Bu futbolchining so‘nggi qaroriga ta’sir qilishi mumkin.
«Tottenhem»
Premyer Ligani 2-o‘rinda yakunlagan « Tottenxem » Mahrezni o‘z safida ko‘rishni istamoqda. Buning uchun « Lester » hisobiga 30-40 million yevro to‘lashni ham rejalashtirgan. Biroq, Mahrezning pozisiyasida “taqachilar” safida bir qator iqtidorli futbolchilar to‘plangan. Alli, Eriksen, Son, Lamela kabi futbolchilarga raqobatchilik qilish biroz qiyin masala.
«Borussiya Dortmund»
Nemis jamoasi ham Mahrez uchun qiziq variant bo‘lishi mumkin. “Borussiya” Marko Roysning jiddiy jarohat olib kamida 6 oyga maydondan tashqarida qolishini hisobga olib kuchli futbolchilarni qidirmoqda. Mavsum kashfiyoti bo‘lgan Usmon Dembeleni esa oxirgi paytlarda “Barselona” bilan bog‘lashmoqda. Tezkor, texnikasi yuqori bo‘lgan Mahrez “Borussiya” istagan futbolchi bo‘lishga imkoniyati yetarli. Biroq, uning nemis jamoasiga o‘tishi Obameyangning ketishiga bog‘liq. Boisi, dortmundliklar katta transferlarni amalga oshiradigan byudjetga ega emas.
«Milan» va «Inter»
Yirik sarmoyadorlar tomonidan sotib olingan ikki klub porloq o‘tmishini qaytarishni istaydi. Buning uchun yirik transferlarni amalga oshirishlariga to‘g‘ri keladi. « Inter »ning xitoylik investorlari bu ishni boshlab yubordi. O‘tgan mavsumda jamoaga Kandreva, Joao Mariu va Gabriel Barbosalar olib kelingandi. Shunga qaramay, klub chempionatni 7-o‘rinda yakunladi. « Milan » ham arang Yevropa Ligasiga ilinib qoldi. Mavsum yakunida yangi investorlarga ega bo‘lgan « Milan » yozgi transfer bozorida ancha faol bo‘lishi kafolatlangan. Mahrez esa bu ikki jamoani kuchaytira olishi mumkin.
