Qatarning arab davlatlari bilan yuzaga kelgan janjalidan «Barselona» klubi ham ozor chekmoqda.

Ole xabariga ko‘ra, BAAda Qatar bilan bog‘liq bo‘lgan hamma narsa taqiqqa uchragan. Uni buzgan fuqarolar katta miqdorda jarimaga tortilishi yoki bundan ham og‘ir jazo – qamoqqa mahkum qilinishi mumkin.

Xususan, endi Qatar Airways nomi tushirilgan «Barselona» futbolkalari ham bu taqiqdan joy oladi. Uni kiygan yoki u bilan suratga tushib, ijtimoiy tarmoqlarga joylashtirganlar 110 ming funt jarimaga tortilishi yoki 15 yilga qamalishi mumkin.

Ma’lumki, yangi mavsumdan boshlab «Barselona» futbolkalarida yangi homiy – Rakuten nomi paydo bo‘ladi. Biroq, kataloniyaliklar Qatar kompaniyasi bilan hamkorlikni davom ettiradi.

Eslatib o‘tamiz, avvalroq 5ta arab mamlakati Qatarni hududdagi barqarorlikni izdan chiqarishda ayblab, barcha aloqalarni uzgan edi.