Қатарнинг араб давлатлари билан юзага келган жанжалидан «Барселона» клуби ҳам озор чекмоқда.

Ole хабарига кўра, БААда Қатар билан боғлиқ бўлган ҳамма нарса тақиққа учраган. Уни бузган фуқаролар катта миқдорда жаримага тортилиши ёки бундан ҳам оғир жазо – қамоққа маҳкум қилиниши мумкин.

Хусусан, энди Qatar Airways номи туширилган «Барселона» футболкалари ҳам бу тақиқдан жой олади. Уни кийган ёки у билан суратга тушиб, ижтимоий тармоқларга жойлаштирганлар 110 минг фунт жаримага тортилиши ёки 15 йилга қамалиши мумкин.

Маълумки, янги мавсумдан бошлаб «Барселона» футболкаларида янги ҳомий – Rakuten номи пайдо бўлади. Бироқ, каталонияликлар Қатар компанияси билан ҳамкорликни давом эттиради.

Эслатиб ўтамиз, аввалроқ 5та араб мамлакати Қатарни ҳудуддаги барқарорликни издан чиқаришда айблаб, барча алоқаларни узган эди.