MTRKning «Sport» telekanali JCH—2018 saralash bosqichida O‘zbekiston milliy terma jamoasi bilan bir guruhdan joy olgan jamoalar ishtirokidagi o‘yinlarni ham jonli namoyish qiladi.

13 iyun, seshanba kungi telekanal dasturlaridan Eron — O‘zbekiston o‘yini takrori ham joy olgan. O‘zbekiston termasi qanday qilib mag‘lub bo‘ldi degan savolga javob topishni istovchilar 13:10 dan boshlab beriladigan translyasiyani ko‘rishi mumkin.

16:55 dan boshlab «Sport» saralashning «B» guruhiga yuzlanadi va Tailand — BAA uchrashuvini jonli namoyish qiladi. 6 iyun kuni Toshkentda 0:2 hisobida mag‘lub bo‘lgan tailandlik futbolchilar, yangi bosh murabbiyga ega bo‘lgan Amirlik termasiga qarshi o‘yinda birinchi g‘alabasi uchun kurashib ko‘radi.

18:40 dan boshlab Suriya hamda Xitoy termalarining o‘yiniga o‘tiladi. Malayziyadagi uchrashuv o‘zbekistonlik futbol muxlislari uchun ahamiyatli. Boisi Suriya ham, Xitoy ham pley-offga yo‘llanma beruvchi 3-o‘rin uchun kurash olib bormoqda.

Va nihoyat 23:55 dan boshlab Qatar — Janubiy Koreya o‘yini start oladi. O‘zbekiston Tehronda mag‘lub bo‘lgani inobatga olinsa, bugun o‘zbekistonliklar Qatarga muxlislik qilishi katta ehtimol. Ramazon oyi, shuningdek, yozning jazirama kuni inobatga olinib, uchrashuv anchagina kech boshlanadi.