Bugun G‘uzorda Qashqadaryo viloyatining ikki nomdor jamoasi o‘zaro bahs yuritadi. Uchrashuv derbi maqomiga ega.
Bugungi uchrashuv G‘uzor shahridagi “G‘uzor” markaziy stadionida soat 19:00da boshlanadi.
Mazkur jamoalarning G‘uzorda o‘tkazilgan 11ta uchrashuvidagi natijalari bo‘yicha kichik ustunlik “Nasaf” tomonida bo‘lib turibdi. “Nasaf” shu paytgacha G‘uzorda o‘tkazilgan uchrashuvlarda 6 marta g‘alaba qozongan. “Sho‘rtan” esa 5 marta g‘alabaga erishgan. Shunisi qiziqki, hali biron marta G‘uzorda durang natija qayd etilmagan. “Oq bo‘rilar” so‘nggi marta 2011 yilgi mavsumning ikkinchi davrasida jamoamiz ustidan 2:1 hisobida g‘alabaga erishgan.
G‘uzorda o‘tkazilgan 11ta uchrashuvda jami darvozalarga 35ta to‘p kiritilgan. To‘plar nisbati 15-20, bunda ham ustunlik jamoamiz tomonida. G‘uzorda o‘tkazilgan ikki uchrashuvda “Sho‘rtan” futbolchilari gol ura olishmagan. Jamoamiz futbolchilari ham ikki uchrashuvda G‘uzordan golsiz qaytishgan.
G‘uzordagi oxirgi o‘zaro o‘tkazilgan 4 uchrashuvda “Nasaf” g‘alaba qozongan.
Quyida bugungi uchrashuv rasmiylarini yana bir marta eslatib o‘tamiz.
O‘zPFL, 13-tur
“Sho‘rtan” (G‘uzor) – “Nasaf” (Qarshi)
15.06.2017. “G‘uzor” markaziy stadioni. 19:00da
Bosh hakam: Sherzod Qosimov (Toshkent)
Qanot hakamlari: Andrey Sapenko (Toshkent vil.), Nabiyjon Ro‘zimov (Toshkent)
Zaxira hakami: Asker Najafaliyev (Toshkent)
Nazoratchi: Radik Serazetdinov (Toshkent)
O‘zPFL vakili: Baxtiyor Mametov.
Barcha futbol ishqibozlarini mana shu qiziqarli uchrashuvga chorlab qolamiz.
