O‘zbekistonlik futbolchi Husniddin G‘ofurov o‘z faoliyatini Serbiya Superligasi vakili — “Mladost” klubida davom ettiradigan bo‘ldi.

22 yoshli futbolchi 2013 yildan buyon Serbiyaning boshqa bir jamoasi – “Yavor Matis” safida to‘p surib kelayotgan edi. O‘tgan mavsum yakuniga ko‘ra, “Yavor” Serbiya Superligasida 16 jamoa orasida 8-pog‘onani egallagan edi. “Mladost” esa 4-o‘rinni band qilgandi.

“To‘rt yil Ivanisada o‘ynaganimdan so‘ng Luchanga ko‘chib o‘tishga qaror qildim. Men Serbiyaning kuchli jamoalaridan biriga o‘tganimdan va murabbiy Nenad Milovanovich bilan ishlash baxtiga muyassar bo‘lganimdan baxtiyorman. Bizni qiyin mavsum kutmoqda. Ammo bu qiyinchiliklarni yengib o‘ta oladigan jamoamiz deb o‘ylayman”, – dedi o‘zbekistonlik futbolchi.

Qayd etish joiz, “Mladost” jamoasi 2016/17 yilgi mavsum yakuniga ko‘ra Yevropa Ligasi 1-saralash bosqichida ishtirok etish huquqini qo‘lga kiritgan. 

Ma’lumot uchun, Husniddin G‘ofurov 1994 yil 29 iyul kuni Farg‘onada tavallud topgan. Serbiya chempionatiga yo‘l olishdan avval hujumkor yarim himoyachi 2012–2013 yillarda O‘zbekiston Birinchiligi vakili – “NBU-Osiyo” sharafini himoya qilgan.

Husniddin G‘ofurov, shuningdek, O‘zbekiston yoshlar termasi (U-17, U-19) va O‘zbekiston olimpiya termasi (U-23) safida ham maydonga tushgan.