UFC jangchisi hisoblangan Konor MakGregor 26 avgust kuni bo‘lib o‘tadigan Floyd Meyvezerga qarshi jang vaqtida oyoqlarini ishga solib yuborishi mumkinmi? Axir har ikki sportchi boks qoidalari bo‘yicha jang qilishga kelib olgan.

Bu masalaga UFC prezidenti Deyna Uayt oydinlik kiritdi va pulni juda yaxshi ko‘radigan Konor bunday ahmoqlikka yo‘l qo‘ymasligiga ishontirishni istadi.

«Jang shartnomasida Konor MakGregor raqibiga oyoq yoki tirsagi bilan zarba bersa, katta jarimaga tortilishi haqida yozib qo‘yilgan. Bu shartnomaning eng birinchi bandi ekanidan kelib chiqib aytamanki, Konorda bunga imkon yo‘q.

Ikkinchidan, bu boks jangi sifatida ro‘yxatdan o‘tgan. Agar Konor qoidalarni buzib, qo‘l yoki tirsagini ishga solsa, bu ish sudgacha yetib boradi. Konor pulni juda yaxshi ko‘radi va ortiqcha harakati katta jarimaga solinishini esidan chiqarmaydi» - dedi Uayt.

Ma’lumot uchun, o‘zaro jang uchun Konor MakGregor ham, Floyd Meyvezer ham 100 million dollardan mukofot puli oladi.