...Kondisioner tagida, momiqqina kresloda oyog‘ini osiltirib, planshetini titkilab o‘tirardi. Ora-sirada miyig‘ida, istehzo bilan kulib qo‘yadi, ba’zan yoqimsiz ishshayadi, uzoq kerilgach, bejirim mo‘ylabini mehrla silab, yana internet oralaydi...

"Vey, qanaqa omi odamlar-a, bular", - deydi o‘ziga-o‘zi ensa qotirib. Petisiyamish, imzo to‘plasharmish. Hiq, qanaqa petisiya!? Hali hammangni bitta-bitta chaqirib, ketingga imzo qo‘yishmasami...Hiq.

Portalga yozganinichi bu axmoqlarni! Agar avom bo‘lishmasa, o‘sha ikki tiyinga qimmat shikoyat aylanib-o‘rgilib yana kaminaning qo‘ligi tushishini bilishardida... Hiq!

Yo‘q, kechirib qo‘yasizlar Sasha yoki Andryushani Xitoyga sotmaguncha tinchimayman! Balki, Eronga pullarman... Ha, mayli bir gap bo‘lar. Ammo, rosa sodda odamlar yashaydida, bizda. Hiq. Boshida hamkasblar, jurnalistlar, muxlislarni yig‘ib, birdam bo‘laylik, mening vertikal-gorizontal futbol falsafam hali butun Osiyoga mashhur bo‘ladi, desam laqqa ishonib o‘tirishibdiya. Hiiiiq.

Ammo, o‘zimda ham ayb bor. Sovunimga kir yuvadiganlarni haddan tashqari erkalatib yubordim. Bittasini qorni osilib, belidan pasti o‘ziga ko‘rinmaydigan bo‘lib qoldi, boshqasi g‘irt taxta, uchinchim esa aksincha, latta. Turgan joyida tizzasini qayirib o‘tiribdiya! Hoshimjonimga nima bo‘ldiki, keyingi vaqtlarda o‘zini quturgan itdek tutyapti?! Hiq. Bunaqada biznesim kasod bo‘ladi. Yangi sheriklar topishim kerak. Tezda. Balki yana Azimboyni o‘ynatarman "osnova"da...

Ufff, shu issiqda press klubga balo bormi? Mana boraman (bosh barmog‘ini qolgan to‘rttasi orasiga qisib ishora qiladi)! Undan ko‘ra, ana Rossiyaga ketaman. Musobaqa bahona eski tanishlar bilan ulfatchilik qilaman, rus saunasida sayrataman. Ha, endi u bu kim g‘ing desa, bo‘lajak raqibimizni o‘yinini kuzatishga keldim, deb qo‘yaman. Hiq. Olam guliston.

Xullas, paytavaquloqlar, dod deysizmi, voy deysizmi baribir avgustda ko‘rishamiz. Haligi hofiz nima derdi, "chidaysizda bu zahmatlar o‘tkinchidir..." Hih, hiiiiiq!"

PS: Yuqoridagi poyintar-soyintar o‘ylar kimning boshida g‘ujg‘on o‘ynayotganini sezgan bo‘lsangiz kerak.

Omon bo‘ling!

O‘tkir Qalamtebratar