Toshkentning «Obod» klubi og‘ir iqtisodiy ahvolga tushib qolgan.
Jamoa futbolchilari uch oydan buyon maosh olmayapti. Murabbiylar va futbolchilar o‘z mablag‘lari hisobiga safar o‘yinlariga borib kelmoqda. Jamoaning bosh homiysi moliyaviy muammolarga duch kelgani sababli, pul bilan ta’minlashni to‘xtatgan.
Mana shunday vaziyatda, rahbariyat faqat birinchi davra oxirigacha jamoani ushlab tura olishini O‘FFga va’da bergan. Afsuski, jamoani qo‘llab turishga qodir yangi homiy topilmagan.
Endi «Obod» ikkinchi davradan boshlab, Oliy ligadagi ishtirokini yakunlashi mumkin. Agar bu ish amalga oshadigan bo‘lsa, jamoaning 1-davradagi barcha natijalari bekor qilinadi.
