“Bunyodkor” – “Lokomotiv” uchrashuvidan keyingi matbuot anjumanining birinchi qismida “qaldirg‘ochlar” ustozi ishtirok etdi.

- Avvalo, barchangizni yaqinlashib kelayotgan xayit bayrami bilan tabriklayman. O‘yin haqida gapiradigan bo‘lsam, mamlakatimizning bugungi kundagi eng kuchli jamoasini mag‘lubiyatga uchratdik. Bizga ochkolar yetishmayotgandi. Shu bois nima qilib bo‘lmasin, raqibni yengishimiz lozim edi. Tanaffusga qadar raqibning ustunligi va mahorati sezildi. Ikkinchi bo‘limda esa ochiq futbol boshlandi va golli vaziyatlar yaratildi. Tanaffus paytida yigitlarga oxirigacha va mas’uliyat bilan o‘ynash lozimligini uqtirgandim. G‘alaba qozonganimizdan xursandman. Jamoamizda yetakchi futbolchilar kamlik qilmoqda. Davralar oralig‘ida seleksiya ishlarini amalga oshiramiz. Lekin hozirgi ustuvor vazifamiz Farg‘onadagi o‘yinga qaratilgan. “Paxtakor” kuchayayotganidan xursandman. Bu borada “Bunyodkor”ning ham o‘z imidji bor. Shunday ekan, o‘zgarishlar albatta foydali bo‘ladi degan umiddaman, - deydi Mirjalol Qosimov.