Farg‘onaning “Neftchi” jamoasi 7 iyulga qadar ta’tilga chiqdi.
Shundan so‘ng Qirgulida ikkinchi davraga tayyorgarlik jarayoni boshlanadi va 16 iyulgacha futbolchilar Farg‘onada shug‘ullanadi. 17 iyul sanasidan boshlab yig‘in Toshkentda davom ettiriladi. Poytaxt yig‘inida 2 ta o‘rtoqlik uchrashuvi rejalashtirilgan. Vadim Abramov shogirdlari 18 iyul kuni “Qizilqum”ga qarshi bellashishsa, 21 iyulda tibbiy ko‘rikdan o‘tishgach, shu kuni “Qo‘qon-1912” jamoasi bilan navbatdagi o‘rtoqlik uchrashuvi bo‘lib o‘tadi. Shundan so‘ng, jamoa 26 iyul kuni “Bunyodkor” bilan O‘zbekiston Kubogidagi javob o‘yinida qatnashadi.
Jamoaning birinchi davradagi qoniqarsiz natijalaridan so‘ng klub rahbariyati murabbiylar shtabida jiddiy o‘zgarishlarga qo‘l urdi. Andrey Fyodorov o‘rniga bosh murabbiylik lavozimiga Vadim Abramov taklif qilindi. Biroq Vadim Abramov murabbiylik davridagi natijalarda ham ijobiy o‘zgarishlar kuzatilmadi. Murabbiy mazkur davr mobaynida asosan jamoa futbolchilarini ko‘zdan kechirdi va amaldagi tarkibdan bir qator futbolchilarning saviyasi bosh murabbiyni qoniqtirmadi. Mutaxassis bir oylik qisqa faoliyatidan shunday xulosaga keldiki, jamoa tarkibi islohotlarga muhtoj. Shu sababli davralar oralig‘ida har bir chiziqni kuchaytirish bo‘yicha seleksiya ishlari olib boriladi. Biroq ayni paytda ko‘plab yuqori saviyali va kuchli futbolchilarni o‘z klublari bilan amaldagi shartnomasi borligi tufayli, Vadim Karlenovich seleksiya jarayonini faol tarzda o‘tkazish imkoniyatiga ega emas. Lekin imkon darajasida tarkib yaxshi saviyali ijrochilar bilan shakllantirishga urg‘u beriladi.
Hozirga kelib jamoa o‘zining sobiq vakillari bo‘lmish Mansur Saidov, Otabek Haydarov va Samarqandning “Dinamo” jamoasida ijarada bo‘lgan Abdujamol Isroilovni ortga qaytardi. Shuningdek 5-6 nafar yangi futbolchilar bilan muzokaralar olib borilmoqda. Mazkur muzokaralar Toshkent yig‘ini boshlangunga qadar hal bo‘lishi kutilmoqda. “Neftchi”ni birinchi davradan so‘ng bir qator futbolchilar tark etishdi. Otabek Isroilov, Ruslan Matniyazov, Nikita Pavlenko hamda Akrom Bahriddinov ikkinchi davrani boshqa jamoada davom ettirishadi. Tarkibda yana bir qator o‘zgarishlar bo‘lishi kutilmoqda.
“Neftchi” PFKning ayni paytdagi eng asosiy maqsadi ikkinchi davrada jamoani turnir jadvalining yuqori pog‘onalaridan joy egallash va muxlislarni stadionga qaytarish sanaladi. Jamoaning ikkinchi davradagi natijalari Vadim Abramovning zimmasida bo‘ladi. Vadim Karlenovich uchun klub rahbariyati barcha sharoitlarni yaratib bergan va uni to‘liq qo‘llab-quvvatlaydi.
