FIFA prezidenti Janni Infantino o‘z vaqtida rossiyalik biznesmen Alisher Usmanovga tegishli bo‘lgan samolyotdan bir necha marta foydalangan.

Mail on Sunday nashrining yozishicha, Usmonovning Rossiya sporti bilan bog‘liq shaxs ekanini inobatga oladigan bo‘lsak, bu «manfaatlar to‘qnashuvi»ni keltirib chiqarishi mumkin.

FIFAning bir necha a’zolari Infantinoning bu harakatidan norozi bo‘lib, yozma ravishda tegishli qo‘mitaga shikoyat qilgan. Infantino shaxsiy samolyotda amalga oshiradigan parvozi haqida tashkilotni ogohlantirmagan. Bu esa FIFA qoidalarining buzilishidir.

Ammo FIFAning ahloq qo‘mitasi bu ayblovlar bo‘yicha aniq dalillarni topolmagan. Prokuror Robert Torresning gapiga ko‘ra, Infantino uchgan samolyot uning do‘sti Leon Semyonenkoga tegishli bo‘lib, u bu samolyotni ikki yil muqaddam Usmonovdan sotib olgan.

«Semyonenko va Usmonovning aloqalari u qadar yaqin emas. Bu hattoki, «manfaatlar to‘qnashuvi» sifatida o‘rganilishga ham arzimaydi», — deya qayd etib o‘tgan Torres.

«Samolyot 2014 yildan buyon menga tegishli. Men va oilam Janni Infantino bilan bir necha yillardan buyon do‘stmiz. Men unga Milan orqali Rimga uchishni taklif qildim, sababi o‘zim ham maxsus tadbirda ishtirok etish uchun uchib ketayotgandim. Keyin men Rimda qoldim, uni esa Jenevaga kuzatib qo‘ydim. Men bu vaziyatni tushuntirish uchun FIFA tergov qo‘mitasiga kamida ikki soat ko‘rsatma berdim», — degan Semyonenko.

Mazkur bayonotlarga qaramasdan, samolyot Infantino undan foydalangan vaqtda boshqa shaxs qo‘liga o‘tgan. Layner Kayman orollarida ro‘yxatga olingan bo‘lib, aslida unga kim egalik qilishi aniq emas. Bu haqdagi ma’lumotlar FIFAga jo‘natilganida, ish allaqachon yopilgani haqida javob kelgan. FIFA vakillaridan birining ta’kidlashicha, agar samolyot Usmonovga tegishli bo‘lgan taqdirda ham, Infantino bu haqda bilmagan va unga nisbatan hech qanday shubha bo‘lishi mumkin emas.