«Barselona» hujumchisi Lionel Messi qamoq jazosidan qutulib qoldi.

Reuters xabariga ko‘ra, Ispaniya sudi Messining soliqlarni to‘lashdan bo‘yin tovlaganlik ishi bo‘yicha chiqarilgan hukmni o‘zgartirdi va qamoq jazosi o‘rniga jarima belgiladi.

Eslatib o‘tamiz, o‘tgan yilning iyul oyida Barselona sudi futbolchi va uning otasi Xorxe Messini 4,1 mln yevro miqdoridagi soliqni to‘lamaganlikda ayblagan va 21 oylik qamoq jazosiga mahkum qilgan edi.

Sudda Messi o‘zining moliyaviy ishlarini otasiga topshirib qo‘yganini va bu bilan hech qachon shug‘ullanmaganini aytgan edi. Hukm o‘qilganidan so‘ng, futbolchining advokatlari apellyasiya shikoyatini topshirishga qaror qildi.

Endi esa, Ispaniya sudi Messiga belgilangan qamoq jazosini o‘zgartirdi va uning har bir kuni uchun 400 yevro jarima joriy qildi. Natijada, futbolchi umumiy hisobda 252 ming yevro jarima bilan qutulib qoladigan bo‘ldi.