«Барселона» ҳужумчиси Лионель Месси қамоқ жазосидан қутулиб қолди.

Reuters хабарига кўра, Испания суди Мессининг солиқларни тўлашдан бўйин товлаганлик иши бўйича чиқарилган ҳукмни ўзгартирди ва қамоқ жазоси ўрнига жарима белгилади.

Эслатиб ўтамиз, ўтган йилнинг июль ойида Барселона суди футболчи ва унинг отаси Хорхе Мессини 4,1 млн евро миқдоридаги солиқни тўламаганликда айблаган ва 21 ойлик қамоқ жазосига маҳкум қилган эди.

Судда Месси ўзининг молиявий ишларини отасига топшириб қўйганини ва бу билан ҳеч қачон шуғулланмаганини айтган эди. Ҳукм ўқилганидан сўнг, футболчининг адвокатлари апелляция шикоятини топширишга қарор қилди.

Энди эса, Испания суди Мессига белгиланган қамоқ жазосини ўзгартирди ва унинг ҳар бир куни учун 400 евро жарима жорий қилди. Натижада, футболчи умумий ҳисобда 252 минг евро жарима билан қутулиб қоладиган бўлди.