Tailandda boks bo‘yicha yoshlar o‘rtasidagi Osiyo chempionati yakuniga yetdi.

Final bahslariga 8 nafar bokschimiz yetib keldi. Hal qiluvchi bahslarda ularning besh nafari g‘alaba qozonib, Osiyo chempioni nomiga sazovor bo‘lishdi.

Samandar Holmurodov (-49 kg.), Farruh Ilhomov (-69 kg.), Rajabboy Atanazarov (-75 kg.), Profsor Rorimsha (-91 kg) va Lazizbek Mullojonov (+91 kg.) lar bugungi bellashuvlarda o‘z raqiblarini mag‘lubiyatga uchratib, yoshlar o‘rtasida Osiyo chempionligini tantana qilgan bo‘lsalar, Abdumalik Halakov (-52 kg.), Bilolbek Mirzarahimov (-64 kg.) va Timur Ergashev (-81 kg.) kumush medallar bilan cheklanishdi. Shuningdek -60 kg. vazn toifasida Saidjamshid Jafarov bronza medali bilan taqdirlandi.

Yoshlar o‘rtasidagi Osiyo chempionatida 10 ta vazn toifasida ringga ko‘tarilgan bokschilarimizdan to‘qqiztasi sovrindorlar safidan joy olishdi va O‘zbekiston terma jamoasi 5 ta oltin, 3 ta kumush va 1 ta bronza medali bilan umumjamoa hisobida 23 ta mamlakat orasida faxrli birinchi o‘rinni egalladi.

O‘zbekiston Milliy olimpiya qo‘mitasi ushbu muvaffaqiyat bilan mamlakat boks federasiyasi, O‘zbekiston yoshlar terma jamoasi va murabbiylar shtabini muborakbod etadi va bulajak nufuzli musobaqalarda ularga omad va zafarlar tilaydi.