Birinchi davrani ko‘tarinki kayfiyatda o‘tkazgan «Qo‘qon-1912» a’zolari qisqa muddatli ta’tildan qaytdi.

Chirchiq shahrida yig‘ilgan futbolchilar 2-davraga tayyorgarlikni boshlab yuborishdi. Mashg‘ulotlar kuniga 2 mahal bo‘lib o‘tadi. Futbolchilar bosh murabbiy tomonidan ishlab chiqilgan reja bo‘yicha tayyorgarlikni olib borishadi.

Muxlislarga bir xushxabarni yetkazmoqchimiz. O‘zining ajoyib o‘yinlari bilan qo‘qonliklar mehrini qozongan Quvondiq Ro‘ziyev jamoa safiga kelib qo‘shildi. Hozircha boshqa yangi futbolchilar yo‘q.

Serbiyalik futbolchilar Darko Gojkovich hamda Filip Rayevas yig‘inga biroz kechroq qo‘shiladi. Ular ayni damda o‘z yurtida hordiq chiqarmoqda.

Jamoa mashg‘ulotlarida darvozabon Muzaffar Abdullayev ishtirok etmayapti. U 2-davrani sobiq jamoasi, Jizzaxning «So‘g‘diyona» klubida o‘tkazish ehtimoli yuqori.

O‘quv - yig‘in mashg‘ulotlari davomida «Qizilqum» va «Neftchi» jamoalari bilan nazorat o‘yinlari o‘tkazish rejaga kiritilgan.