Биринчи даврани кўтаринки кайфиятда ўтказган «Қўқон-1912» аъзолари қисқа муддатли таътилдан қайтди.

Чирчиқ шаҳрида йиғилган футболчилар 2-даврага тайёргарликни бошлаб юборишди. Машғулотлар кунига 2 маҳал бўлиб ўтади. Футболчилар бош мураббий томонидан ишлаб чиқилган режа бўйича тайёргарликни олиб боришади.

Мухлисларга бир хушхабарни етказмоқчимиз. Ўзининг ажойиб ўйинлари билан қўқонликлар меҳрини қозонган Қувондиқ Рўзиев жамоа сафига келиб қўшилди. Ҳозирча бошқа янги футболчилар йўқ.

Сербиялик футболчилар Дарко Гожкович ҳамда Филип Райевац йиғинга бироз кечроқ қўшилади. Улар айни дамда ўз юртида ҳордиқ чиқармоқда.

Жамоа машғулотларида дарвозабон Музаффар Абдуллаев иштирок этмаяпти. У 2-даврани собиқ жамоаси, Жиззахнинг «Сўғдиёна» клубида ўтказиш эҳтимоли юқори.

Ўқув - йиғин машғулотлари давомида «Қизилқум» ва «Нефтчи» жамоалари билан назорат ўйинлари ўтказиш режага киритилган.