Joriy yilgi mavsum birinchi qismini qo‘shni Qirg‘iziston chempionatida "Oloy" jamoasi safida o‘ynagan darvozabon Mirzohid Mamatxonov yana "Navbahor"ga qaytdi.

Mamatxonov huquqiy jihatdan "lochinlar"ga tegishli bo‘lganligi sababli yarim yilga ijaraga berilgandi. Endilikda Mamatxonov faoliyatini yana "Navbahor"da davom ettiradi. Bundan tashqari ikkinchi davrani boshqa jamoada o‘tkazishi kutilgan hujumchi Ro‘zimboy Ahmedovni ham Namanganda tashkil etilgan yig‘inda qatnashayotganligini aytib o‘tish joiz. Klubimizz legionerlari Darko Stanoyevich va Nemanya Yovalanovichlar tanaffusdan foydalanib, o‘z mamlakatlariga jo‘nab ketishgandi. Tez orada ular "Navbahor" ixtiyoriga yetib kelishadi. Himoyachi Abbos Otaxonov esa Ravshan Haydarov boshchiligidagi yoshlar terma jamoasiga jalb etilganligi sababli safga keyinroq qo‘shiladi. Shuningdek, yig‘inda qatnasha olmayotgan yarim himoyachi Oybek Qilichev ham tez orada mashg‘ulotlarga qaytadi. Bevosita mashg‘ulotlar xususida gap ketganida jamoamiz a’zolari kuniga ikki maxaldan shug‘ullanishayotganini ta’kidlash lozim. Ertalabki mashg‘ulot paytida jismoniy xolatni yaxshilashga qaratilgan mashqlar bajarilayotgan bo‘lsa, kechki paytda futbolchilar to‘p bilan ko‘proq ishlash imkoniga ega bo‘lishmoqda.