Futzal bo‘yicha O‘zbekiston milliy terma jamoasi yig‘inni davom ettirmoqda. Bahodir Ahmedov boshchiligidagi termamiz mashg‘ulotlarga 2 iyuldan kirishgani haqida xabar bergan edik.

Ayni paytda mamlakatimizning amaldagi chempioni "Olmaliq" klublar o‘rtasidagi Osiyo chempionatiga tayyorgarlikning yakuniy pallasiga yetib kelgan. Shu munosabat bilan bugun O‘zbekiston milliy terma jamoasi va "Olmaliq" klublari o‘zaro nazorat uchrashuvi o‘tkazishdi. O‘yinda avvaliga Ahmedov boshchiligidagi terma jamoa 3:1 hisobida oldinga o‘tib olgan edi. Lekin, keyinchalik tajribali futzalchilardan iborat olmaliqliklar to‘rtta gol urishdi va g‘alabani ilib ketishdi.

Nazorat uchrashuvi
"O‘zbekiston" sport majmuasi
O‘zbekiston MTJ - "Olmaliq" 3:5
Gollar: F.Faxriddinov 2ta, T.Sadirov - K.Sviridov 2ta, D.Rahmatov 2ta, T.Sadirov (avt.)
O‘zbekiston MTJ: Rustam Umarov, Shavkat Ibragimov, Akmal Xazratqulov, Aziz Xushboqov, Feruz Faxriddinov, Alisher Ibragimov, Oybek Polvonov, Davron Choriyev, Axror Umarjonov, Timur Berdiyev, Anasxon Rahmatov, Dilmurod Shavkatov, Mashrab Odilov, Davron Abdurahmonov, Timur Sadirov, Akbar Usmonov, Islom Biturayev, Ixtiyor Ropiyev, Xushnur Erkinov.
"Olmaliq": Klim Tyugayev, Ravshan Eliboyev, Sunnat Anvarov, Jamoliddin Sharipov, Konstantin Sviridov, Artur Yunusov, Farhod Abdumavlonov, Dilshod Rahmatov, Javlon Anorov, Dilshod Irsaliyev, Shuhrat Tojiboyev, Ilhom Rajabov, Sunnat Kuralov, Sirojiddin Mahmudov, Sarvar Shoahmedov.

Eslatib o‘tamiz, O‘zbekiston terma jamoasi shu yilning 17-27 sentyabr kunlari Turkmanistonda o‘tadigan Yopiq inshootlardagi Osiyo o‘yinlariga tayyorgarlik olib borayotgan bo‘lsa, "Olmaliq" 20-30 iyul kunlari Vyetnamda bo‘lib o‘tadigan klublar o‘rtasidagi Osiyo chempionatiga tayyorlanmoqda.