«Barselona» vakili Jozep Vives 2016/17 yilgi mavsum bo‘yicha iqtisodiy hisobotni e’lon qildi. Unga ko‘ra, jamoa o‘tgan mavsum rekord miqdordagi daromadni qo‘lga kiritgan — 708 million yevro. Shundan 18 millioni sof foydani tashkil qiladi.

Shuningdek, jamoaning kredit qarzi kamaygan. Endi klub bo‘ynida 247 million yevro to‘lanishi kerak bo‘lgan kredit qolgan. Bu esa o‘tgan mavsumga nisbatan 24,5 million yevroga kam. O‘tgan mavsumda futbolchilarning maoshi daromadning 66 foizini tashkil qilgan.

«Klubning moliyaviy ko‘rsatkichlari strategik o‘sish rejalariga mos bo‘ldi», — deya bayonot berdi Vives.

"Barselona"ning stratagik rejasiga ko‘ra, klub 2021 yilga kelib 1 milliard yevro daromad olishi kerak.

Forbes jurnali o‘tgan mavsumda e’lon qilgan reytingda «Barselona» 4-o‘rinni egallagandi. Jurnal klubni 3,64 milliard yevroga baholagandi. «Dallas Kovboys» (Amerika futbol), «Nyu-York Yankiz» (beysbol) va «Manchester Yunayted» klublari eng qimmatbaho jamoalar sifatida tan olingandi.