«Navbahor» Toshkentda tashkil etilgan yig‘inni yakunladi.

Uning so‘ngida "Buxoro" jamoasiga qarshi nazorat o‘yini o‘tkazildi. O‘yinda «Navbahor» futbolchilari 1:2 hisobida imkoniyatni boy berishdi.

Uchrashuvning birinchi bo‘limida Mirzohid G‘ofurovning zarbasidan so‘ng namanganliklar hisobda oldinga chiqib olishdi. Tanaffusdan keyin "Buxoro" jamoasi a’zolari darvozani ikki bor nishonga olishdi. Avvaliga Azamat Allaniyozov hisobni tenglashtirgan bo‘lsa, Vladimir Bayenko g‘alabani ta’minlagan golga mualliflik qildi.

Uchrashuvni «Navbahor» quyidagi tarkibda o‘tkazdi: Asilbek Amanov, Jahongir Mehmonov, Darko Stanoyevich, Mirzohid G‘ofurov, Abbos Otaxonov, A’zam Aliyev, Dilshod Jabborov, Abbos Maxstaliyev, Said Abdujabborov, Oybek Qilichev, Doniyor Usmonov. Zaxiradan maydonga tushganlar: Mirzohid Mamatxonov, Ilhom Boydedayev, Murod Rajabov, Azizbek Turg‘unboyev, Ro‘zimboy Ahmedov, Ravshan Xursanov.

"Buxoro" bilan o‘tgan o‘yinda murabbiylar ikki nafar yangi futbolchini sinovdan o‘tkazishdi. Birinchi davrani "Neftchi"da o‘tkazgan Saidjon Abdujabborov asosiy tarkibda maydonga tushdi. Tanaffusdan so‘ng esa "Bunyodkor"dan jalb etilgan yosh futbolchi ham maydonga tushdi.

Har ikki futbolchini jamoada qolish yoki qolmasligiga shu kunlarda oydinlik kiritiladi. O‘z navbatida birinchi davrani "Navbahor"da o‘tkazgan Alisher Mirzayev "Obod" jamoasiga qaytdi.

Toshkent yig‘inidagi so‘nggi o‘yindan so‘ng jamoa a’zolariga bir kunlik ta’til e’lon qilindi. 25 iyuldan mashg‘ulotlar Namanganda davom ettiriladi.