"Navbahor" a’zolari bugun Namanganda to‘planib, mashg‘ulotlarni boshlaydi.

Avval tarkibga “Bunyodkor”dan darvozabon Dilshod Hamroyevni kelib qo‘shilgan edi. Aynan shu sababli Toshkent yig‘inidagi mashg‘ulotlarda qatnashgan boshqa bir posbon Sarvar Karimov bu safargi yig‘inga jalb etilmadi.

Shuningdek, 2016 yilgi o‘smirlar o‘rtasidagi Osiyo chempionatining final bosqich qatnashchisi Oston O‘runov ham mashg‘ulotlarga qo‘shildi.

2000 yilning 19 dekabr sanasida tug‘ilgan iqtidorli yarim himoyachi “Navbahor”ga “Paxtakor” klubidan jalb etildi. Yarim himoyachi o‘tgan yili Hindistonda o‘tkazilgan Osiyo chempionatidagi barcha to‘rtta uchrashuvda ham asosiy tarkibda maydonga tushganligini qo‘shimcha qilish joiz. Bundan tashqari yig‘inda Saidjon Abdujabborov (8.07.1992 yilga tug‘ilgan) ham qatnashadi. Ushbu futbolchi Toshkentdagi mashg‘ulotlar so‘nggida jamoa safiga qo‘shilgandi.

Jamoaning Namangandagi yig‘ini 30 iyulga qadar davom etadi. Bu vaqt oralig‘ida futbolchilarimiz birinchi liga vakili “Yozyovon Lochinlari” jamoasiga qarshi nazorat o‘yinida maydonga tushadi. Ushbu o‘yin 29 iyul kuni “Markaziy” o‘yingohda soat 19.00da bo‘lib o‘tadi. Jamoamiz a’zolari 30 iyul sanasida Toshkentga yo‘l olishadi. Keyingi haftaning dastlabki kunida murabbiy va futbolchilar tibbiy ko‘rikdan o‘tishadi. Shundan keyin ikkinchi davraning “Obod”ga qarshi o‘tadigan dastlabki uchrashuviga tayyorgarlikka kirishiladi.