"Навбаҳор" аъзолари бугун Наманганда тўпланиб, машғулотларни бошлайди.
Аввал таркибга “Бунёдкор”дан дарвозабон Дилшод Ҳамроевни келиб қўшилган эди. Айнан шу сабабли Тошкент йиғинидаги машғулотларда қатнашган бошқа бир посбон Сарвар Каримов бу сафарги йиғинга жалб этилмади.
Шунингдек, 2016 йилги ўсмирлар ўртасидаги Осиё чемпионатининг финал босқич қатнашчиси Остон Ўрунов ҳам машғулотларга қўшилди.
2000 йилнинг 19 декабр санасида туғилган иқтидорли ярим ҳимоячи “Навбаҳор”га “Пахтакор” клубидан жалб этилди. Ярим ҳимоячи ўтган йили Ҳиндистонда ўтказилган Осиё чемпионатидаги барча тўртта учрашувда ҳам асосий таркибда майдонга тушганлигини қўшимча қилиш жоиз. Бундан ташқари йиғинда Саиджон Абдужабборов (8.07.1992 йилга туғилган) ҳам қатнашади. Ушбу футболчи Тошкентдаги машғулотлар сўнггида жамоа сафига қўшилганди.
Жамоанинг Намангандаги йиғини 30 июлга қадар давом этади. Бу вақт оралиғида футболчиларимиз биринчи лига вакили “Ёзёвон Лочинлари” жамоасига қарши назорат ўйинида майдонга тушади. Ушбу ўйин 29 июль куни “Марказий” ўйингоҳда соат 19.00да бўлиб ўтади. Жамоамиз аъзолари 30 июль санасида Тошкентга йўл олишади. Кейинги ҳафтанинг дастлабки кунида мураббий ва футболчилар тиббий кўрикдан ўтишади. Шундан кейин иккинчи давранинг “Обод”га қарши ўтадиган дастлабки учрашувига тайёргарликка киришилади.
