Bugun “Qo‘qon-1912” jamoasi safiga ikkinchi davra arafasida kelib qo‘shilgan yangi futbolchilarni tanishtirish marosimini o‘tkazdi.

Qo‘qondagi “Markaziy” o‘yingohida bo‘lib o‘tgan tadbirda “Qo‘qon spirt” AJ boshqaruv Kengashi raisi vazifasini bajaruvchisi I. Abdullayev , “Qo‘qon-1912” klubi rahbariyati, murabbiylar shtabi, futbolchilar va bir qator muxlislar ishtrok etishdi.

Marosimni “Qo‘qon-1912” futbol klubi vise-prezidenti Baxtiyorjon Tolipov ochdi.

«Bu yilgi mavsum jamoamiz uchun juda muvaffaqiyatli o‘tmoqda, deb so‘z boshladi klub rahbari. – Birinchi davrani a’lo darajada o‘tkazdik. Shuning uchun ikkinchi davra arafasida tarkibga ikki nafar futbolchi jalb etdik xolos. Ular Quvondiq Ro‘ziyev va Doniyor Hasanov.

Jamoamizning oldidagi maqsadi - Osiyo chempionlar ligasiga yo‘llanma olish. O‘ylaymanki, mavsum so‘nggida o‘z oldimizga qo‘ygan vazifani bajara olamiz. Bunda albatta siz muxlislarning ko‘magi ham kerak bo‘ladi. “Qo‘qon-1912”ning fidoyi muxlislari bisyor ekanligini bilaman. Sizlar jamoamizni yaxshi yomon kunlarida qo‘llab-quvvatlab keldingiz. Buning uchun barchangizga jamoa nomidan minnatdorchilik izhor etaman. Bugun ikkinchi davra arafasida o‘z safimizga qo‘shib olgan yangi futbolchilarni keng ommaga tanishtiramiz» - dedi u.

Shundan keyin yangi o‘yinchilarga liboslar topshirildi. Quvondiq Ro‘ziyev 70, Doniyor Hasanov 14-raqam ostida maydonga tushishi oydinlashdi.

Marosim ko‘tarinki ruhda o‘z yakuniga yetdi. Tadbir so‘ngida ishqibozlar ertaga bo‘ladigan “Nasaf”ga qarshi o‘yindan oldingi mashg‘ulotlarini tomosha qilishdi.